ગોધરાના રહેણાક મકાનમાં આગ, એક જ પરિવારના 4નાં મોત:પુત્રની સગાઈ માટે હરખભેર વાપી જવાની તૈયારી હતી
શહેરના બામરોલી રોડ પર આવેલા ગંગોત્રીનગર વિસ્તારમાં આજે (21 નવેમ્બર) વહેલી સવારે એક અત્યંત હૃદયદ્રાવક અને કંપાવી દેનારી ઘટના સામે આવી છે, જ્યાં 'શરણાઈ'ના સૂર રેલાય એ પહેલાં જ એક હસતા-ખેલતા પરિવારના ચાર સભ્યનાં કરુણ મોત નીપજ્યાં છે. પ્રસંગની ખુશીને માતમના ઘેરા શોકમાં ફેરવી નાખનારી આ ઘટનાએ સમગ્ર ગોધરા શહેરને સ્તબ્ધ કરી દીધું છે.
મૃતકોની યાદી
આ કરુણ દુર્ઘટનામાં દોશી પરિવારના ચાર સભ્યનાં મોત થયાં છે:
- કમલભાઈ દોશી (ઉં.વ. 50) - પિતા અને જ્વેલર્સના માલિક
- દેવલબેન દોશી (ઉં.વ. 45) - માતા
- દેવ કમલભાઈ દોશી (ઉં.વ. 24) - જેની સગાઈ હતી તે યુવાન પુત્ર
- રાજ કમલભાઈ દોશી (ઉં.વ. 22) - નાનો પુત્ર
પુત્રની સગાઈ માટે હરખભેર વાપી જવાની તૈયારી હતી
બામરોલી રોડ પર અંકુર સોસાયટીની બાજુમાં આવેલા ગંગોત્રીનગર (સેતુ ક્લબ પાસે)માં રહેતો અને શહેરમાં જાણીતા 'વર્ધમાન જ્વેલર્સ'ના વ્યવસાય સાથે સંકળાયેલો કમલભાઈ દોશીનો પરિવાર આજે ભારે ઉત્સાહમાં હતો. આજે સવારે જ તેમના 24 વર્ષીય પુત્ર દેવ દોશીની સગાઈ માટે આખો પરિવાર હરખભેર વાપી જવા રવાના થવાનો હતો.
દોશી પરિવારની સગાઈની ખુશી માતમમાં ફેરવાઈ
ગઈકાલે રાત્રે પિતા કમલભાઈ દોશી (ઉં.વ. 50), માતા દેવલબેન દોશી (ઉં.વ. 45) અને તેમના બે આશાસ્પદ યુવાન પુત્ર દેવ (ઉં.વ. 24) અને રાજ (ઉં.વ. 22) આવતીકાલના શુભ પ્રસંગની ચર્ચા કરતાં અને હસી-મજાક કરતાં સૂતાં હતાં. તેમને ક્યાં ખબર હતી કે એ રાત તેમની છેલ્લી રાત સાબિત થવાની છે.
ગ્રાઉન્ડ ફ્લોર પર રાખેલા સોફામાં અચાનક આગ લાગી
મળતી માહિતી મુજબ, મોડીરાત્રે કે વહેલી સવારે ઘરના ગ્રાઉન્ડ ફ્લોર પર રાખેલા સોફામાં શોર્ટસર્કિટ કે અન્ય કોઈ કારણોસર આગ લાગી હતી. દુર્ઘટનાનું સૌથી કરુણ પાસું એ રહ્યું કે ઘર ચારે તરફ કાચથી સંપૂર્ણપણે પેક હતું, જેના કારણે આગમાંથી પેદા થયેલો ઝેરી ધુમાડો બહાર નીકળી શક્યો નહીં અને સમગ્ર ઘરમાં ભરાઈ ગયો. ગાઢ નિદ્રામાં સૂતેલા પરિવારને જાગવાની કે બચવાની જરા પણ તક મળી ન શકી અને ઝેરી ધુમાડામાં શ્વાસ રૂંધાવાથી ચારેય સભ્યનાં ઘટનાસ્થળે જ ગૂંગળાઈને કરુણ મોત નીપજ્યાં.
ખુશીનાં તોરણ બંધાવાનાં હતાં, ત્યાં કાળનો પંજો ફર્યો
સવારે જ્યારે આસપાસના લોકોને ઘટનાની જાણ થઈ અને ફાયર વિભાગને બોલાવાવો ત્યાં સુધીમાં ઘણું મોડું થઈ ચૂક્યું હતું. ફાયરબ્રિગેડ દ્વારા બચાવ કામગીરી હાથ ધરવામાં આવી, પરંતુ અંદર ગયેલા તમામ સભ્યના મૃતદેહ જ બહાર કાઢી શકાયા.
સમગ્ર વેપારી આલમમાં ઘેરો શોક છવાયો
આજે જે ઘરમાંથી દીકરાએ વરરાજા બનીને સગાઈ માટે નીકળવાનું હતું એ જ ઘરમાંથી એકસાથે ચાર-ચાર લોકો જીવતા હોમાતા જોઇને પથ્થર દિલ માણસ પણ રડી પડ્યા હતા. આ બનાવના કારણે માત્ર ગંગોત્રીનગર જ નહીં, પરંતુ સમગ્ર વેપારી આલમમાં ઘેરો શોક છવાઈ ગયો છે. વાપીમાં જ્યાં સગાઈની તૈયારીઓ ચાલી રહી હતી ત્યાં વેવાઈ પક્ષ પર પણ આ સમાચાર વજ્રઘાત સમાન સાબિત થયા છે.
હસતા-રમતા આખા પરિવાર સભ્યોનાં આ રીતે અચાનક મૃત્યુ થતાં શહેરમાં સન્નાટો
નિયતિ જ્યારે રૂઠે છે ત્યારે એ સમય કે સંજોગ કઈ જ જોતી નથી, એનું આ ગોધરામાં જોવા મળેલું ઉદાહરણ ખરેખર હૃદય કંપાવી દે એવું છે. હસતા-રમતા આખા પરિવારના સભ્યોનાં આ રીતે અણધાર્ય મૃત્યુ થતાં શહેરમાં સન્નાટો છવાઈ ગયો છે.
