માતા-પુત્રોએ મળી પિતાનું ઘરમાં જ છરીથી ઢીમ ઢાળી દીધું:રાજકોટમાં ઘર કંકાસમાં ખૂની ખેલ ખેલાયો
રાજકોટ શહેરમાં વધુ એક વખત સંબંધોનું ખૂન થયું છે. ગત મોડીરાત્રે ભક્તિનગર વિસ્તારમાં આવેલા હુડકો ક્વાર્ટરમાં રહેતા નરેશભાઈને તેની પત્ની અને પુત્રએ સાથે મળી છરીના ઘા મારી મોતને ઘાટ ઉતારી દીધા છે. બનાવની જાણ થતાં સ્થાનિક પોલીસની સાથે સાથ ક્રાઇમ બ્રાન્ચ અને LCB ટીમ પણ સ્થળે પહોંચી હતી. એસીપી અને ડીસીપી કક્ષાના અધિકારીઓ પણ ઘટનાસ્થળે તપાસ અર્થે પહોંચ્યા હતા. હાલ પોલીસે FSLની મદદ મેળવી મૃતદેહને પોસ્ટમોર્ટમ અર્થે ખસેડી હત્યાનો ગુનો નોંધી તપાસ તજવીજ હાથ ધરી છે. ઉલ્લેખનીય છે કે હત્યારા માતા-પુત્ર પોલીસ સકંજામાં છે, જેની અટકાયત કરી પોલીસે સઘન પૂછપરછ હાથ ધરી છે.
મૃતદેહની બાજુમાં કાળા કલરની છરી પડી હતીઃ ACP
રાજકોટ શહેર એસીપી બી. વી. જાધવએ જણાવ્યું હતું કે, ભક્તિનગર પોલીસ સ્ટેશન વિસ્તારમાં આવેલા હુડકો ક્વાર્ટરમાં નરેશભાઈ નટુભાઈ વ્યાસ (ઉં.વ.42)ની તેના જ ઘરમાં તેનાં પત્ની અને પુત્ર દ્વારા છરી મારી હત્યા નિપજાવવામાં આવી છે. બનાવ અંગે પુરાવા એકત્રિત કરવા તેમજ સેમ્પલ મેળવવા માટે પોલીસ દ્વારા FSLની મદદ લેવામાં આવી છે અને મૃતદેહ પોસ્ટમોર્ટમ અર્થે ખસેડી હત્યાનો ગુનો નોંધવા માટે તપાસ તજવીજ હાથ ચાલુ છે.
ઘર કંકાસમાં હત્યા કરાઈ હોવાનું પ્રાથમિક અનુમાન
મૃતક નરેશભાઈ નટુભાઈ વ્યાસને બે સંતાન હોવાનું અને પોતે મોજાંનો હોલસેલ વેપાર કરતા હોવાનું પોલીસ તપાસમાં સામે આવ્યું છે. બનાવ અંગે હાલ ભક્તિનગર પોલીસે મૃતકની પત્ની તેમજ તેનાં બે સંતાનની અટકાયત કરી સઘન પૂછપરછ હાથ ધરી છે.
ઉલ્લેખનીય છે કે પોલીસની પ્રાથમિક તપાસમાં હત્યા પાછળ ઘર કંકાસ અને મૃતકને કેફી પીણું પીવાની કુટેવથી કંટાળી છરી વડે હુમલો કરી નરેશભાઈને મોતને ઘાટ ઉતારવામાં આવ્યા હોવાનું બહાર આવ્યું છે.
