સુરતના કવાસ ક્રિકેટ ગ્રાઉન્ડમાંથી નવજાત બાળકી મળી:મોડીરાતે રડવાનો અવાજ સાંભળી લોકો દોડ્યા, માસૂમ ICUમાં દાખલ; નિર્દયી માતા-પિતાને શોધનારને 11,000નું ઇનામ
બાળકી હાલ ICUમાં છે અને સારવાર ચાલી રહી છે: PI ઇચ્છાપોર પોલીસ મથકના ઇન્સ્પેક્ટર અનિરુદ્ધસિંહ ગોહિલે બાળકી બાબતે જણાવ્યું હતું કે બાળકી હાલ ICUમાં છે અને સારવાર ચાલી રહી છે. બાળકીને કોણ મૂકી ગયું છે એ અંગેની તપાસ ચાલી રહી છે. અમે અલગ-અલગ વિસ્તારોના સીસીટીવી ફૂટેજની તપાસ કરી રહ્યા છીએ. આશાવર્કરો સાથે પણ સંપર્કમાં છીએ. નજીકમાં આવેલી તમામ હોસ્પિટલોમાં પણ અમે તપાસ કરી રહ્યા છીએ.
બાળકીનો રડવાનો અવાજ સાંભળી લોકોએ તપાસ કરી જૂના કવાસ ક્રિકેટ ગ્રાઉન્ડ પાસેથી પસાર થતા સ્થાનિક લોકોએ અચાનક બાળકીના રડવાનો અવાજ સાંભળ્યો હતો. એ બાદ લોકોએ અવાજની દિશામાં જઈને તપાસ કરતાં તેમને તાજી જન્મેલી એક બાળકી ત્યજેલી અને નિઃસહાય હાલતમાં મળી હતી. ક્રિકેટ ગ્રાઉન્ડ જેવી ખુલ્લી જગ્યાએ નવજાત શિશુ મળતાં જ આસપાસના લોકો મોટી સંખ્યામાં ઘટનાસ્થળે ભેગા થઈ ગયા હતા. લોકોમાં દયાની સાથે-સાથે બાળકીને ત્યજી દેનારાં માતા-પિતા પ્રત્યે ભારે ગુસ્સો જોવા મળ્યો હતો.
પોલીસે તાત્કાલિક બાળકીને સારવાર માટે ખસેડી આ ગંભીર અને અમાનવીય કૃત્યની જાણ થતાં જ ઇચ્છાપોર પોલીસ સ્ટેશનનો સ્ટાફ સમય બગાડ્યા વિના તાત્કાલિક સ્થળ પર દોડી આવ્યો હતો. પોલીસે સૌપ્રથમ કાયદેસરની કાર્યવાહી બાજુ પર મૂકીને માનવતાનું ઉત્તમ ઉદાહરણ પૂરું પાડ્યું હતું. બાળકીની નાજુક હાલતને જોતાં પોલીસે તેને તાત્કાલિક સારવાર મળી રહે એ હેતુથી સુરત સિવિલ હોસ્પિટલ ખસેડી હતી. હાલમાં તબીબી સ્ટાફ દ્વારા બાળકીની સઘન સારવાર ચાલી રહી છે. પોલીસ બાળકી સ્વસ્થ થાય એ માટે પ્રાર્થના કરી રહી છે.
માતા-પિતાને શોધી કાઢનારને 11,000નું ઇનામ આ અમાનવીય કૃત્ય કરનારાં નિર્દયી માતા-પિતાને શોધી કાઢવા માટે ઇચ્છાપોર પોલીસે કાયદેસરની કાર્યવાહી શરૂ કરી દીધી છે. ઇચ્છાપોર પોલીસ દ્વારા સત્તાવાર જાહેરાત કરવામાં આવી છે કે જે કોઈ વ્યક્તિ આ નવજાત શિશુનાં માતા-પિતાને શોધી કાઢવામાં મદદ કરશે અથવા તેમની સચોટ માહિતી આપશે તેને 11,000નું રોકડ ઇનામ આપવામાં આવશે.
પોલીસની અન્ય દિશામાં પણ તપાસ તેજ પોલીસ દ્વારા જાહેર કરાયેલું આ ઇનામ સમાજને આ તપાસમાં સહકાર આપવા માટે પ્રેરિત કરશે. પોલીસે આસપાસના વિસ્તારોમાં લગાવેલા સીસીટીવી ફૂટેજની તપાસ, હોસ્પિટલોમાં તાજેતરમાં પ્રસૂતિ થયેલી મહિલાઓની વિગતો અને સ્થાનિક લોકોની ઊંડાણપૂર્વક પૂછપરછ શરૂ કરી દીધી છે. પોલીસને આશા છે કે જલદીથી આ નવજાત બાળકીનાં માતા-પિતા મળે અને તેમને તેમનાં કૃત્ય માટે કાયદાકીય સજા થશે.
Image Gallery
